الأكتفاء مش بالشعلقه و الأحلام

من سنتين واحدة اعترفتلى أنها بتحب واحد .. الواحد ده شخصيه مشهوره جدا" على الميديا طفشان من مصر بسبب مواقفه السياسيه الداعمه للاخوان .. قولتلها ما تتعلقيش بأمل دايب .. مش علشان اتكلم معاكى كلمتين فى الانبوكس يبقى بيحبك و هيتجوزك .. طبعا" اتضايقت من كلامى .. بعدها بفترة الشخص ده اتجوز .. طبعا" مش من صديقتنا فى البرنامج .. تحليلى كان مظبوط !!!

انا بستغرب جدا" من اللى بيعمل ادد لبنت ميعرفهاش من البرازيل علشان مزة .. او واحده مجنونه باحمد عز او آسر ياسين و او إى شخصيه وهميه تانيه .. و بعدين ؟؟ .ايه الخطوة اللى بعد كدة .. ليه انتحار المشاعر دة على اشخاص وهميه مافيش أمل معاها .. 

* الشخص القريب منك و بيشاركك لحظاتك هو اجمل شخص حتى لو مليان عيوب ... حتى لو مش وسيم او غنى .. الاكتفاء مش بالشعلقه و الاحلام المستحيله .. الاكتفاء بالرضا .. فن الممكن و الحقيقى الملموس .. اعرف ناس كتير اتجوزوا من غير حب بس كان عندهم الجرأة يختاروا بعض .. هى مكانتش فتاة احلامه و السوبر موديل اللى بتظهر على السجادة الحمراء بفستان من تصميم ديور .. و هو مكانش الفارس الوسيم اللى راكب الحصان اللى هيخطفها .. بس بجرعه كافيه من التعايش و التفاهم وصلوا للحب ... وصلوا أنهم يبقوا كيان واحد ضد الحياة و مشاكلها ... 

أنا عاوزك تحلم .. مش ضد احلامك .. بس احلام حقيقيه ممكن تتحقق .. مش احلام مستحيله تستنزف مشاعرك و احساسك مع وهم و سراب ..مش احلام تخليك متعرفش تتعامل مع الواقع و شخصياته و تفصلك عنهم !!!